इन्डोनेसियामा यात्रुवाहक जहाजमा आगलागी, ३ को मृत्यु, सयभन्दा बढी बेपत्ता

इन्डोनेसियाको उत्तरी सुलावेसी प्रान्त नजिक आइतबार दिउँसो एक यात्रुवाहक जहाजमा भयावह आगलागी हुँदा कम्तीमा तीन जनाको मृत्यु भएको छ। जहाजमा सवार २८० यात्रुमध्ये १५० जनालाई सकुशल उद्धार गरिए पनि अझै १०० भन्दा बढी यात्रु बेपत्ता रहेका छन्।

केएम बार्सिलोना भीए नामक जहाज तालाउड टापुबाट मानाडो बन्दरगाहतर्फ जाँदै गर्दा तालिसे टापुनजिकै दिउँसो १:३० बजे अचानक आगो लागेको हो। क्षेत्रीय विपद् व्यवस्थापन एजेन्सीका अनुसार आगो अत्यधिक तीव्र गतिमा फैलिएकोले धेरै यात्रुहरूले समुद्रमा हाम फालेर ज्यान जोगाउन प्रयास गरेका थिए।

घटनास्थलमा इन्डोनेसियाको राष्ट्रिय खोज तथा उद्धार एजेन्सी, नौसेना, तटरक्षक तथा स्थानीय मछुवाहरू खटिएर उद्धार कार्य जारी राखेका छन्। अहिलेसम्म आगलागीको कारण स्पष्ट नभएको जनाइएको छ।

लिकुपाङ बन्दरगाहमा उद्धार तथा समन्वयका लागि कमान्ड पोस्ट स्थापना गरिएको छ।

इन्डोनेसियामा जलमार्गमार्फत आवतजावत प्रचलित भए पनि यस किसिमका दुर्घटना समय–समयमा हुने गरेका छन्, जसले समुद्री सुरक्षामाथि प्रश्न उठाउँदै आएको छ।